Yn ystod yr ymateb i’r pandemig COVID-19, bu Awdurdod Llundain Fwyaf (GLA) yn gweithio ar y cyd â chymdeithas sifil Llundain, gan gynnal byrddau crwn ar-lein, sesiynau briffio iechyd cyhoeddus, a digwyddiadau Sgwrs Fawr. Gan weithio gyda phartneriaid iechyd, chwaraeodd y fforymau hyn ran hanfodol wrth ategu profion a’r ymateb i’r brechlynnau, adeiladu ymddiriedaeth, a rhannu gwybodaeth gywir a diwylliannol gymwys.
Yn dilyn y pandemig, roedd yna agwedd benderfynol at ddysgu’r gwersi o’r cydweithredu yma, gan ymgorffori’r dulliau yma ymhellach mewn rhaglenni brechu a gwaith i fynd i’r afael ag anghydraddoldebau iechyd. Digwyddodd hyn yn bennaf trwy Bartneriaeth Ecwiti Iechyd Etifeddol Llundain. Yn ystod y cyfnod hwn, parhaodd sesiynau briffio iechyd cyhoeddus, a gynullwyd ar y cyd gan y GLA a’r GIG, yn ymdrin â materion fel parodrwydd ar gyfer y gaeaf ac iechyd meddwl.
Mae’r GLA wedi cryfhau perthnasoedd ymhellach â phartneriaid cymunedol a phartneriaid ffydd o fewn eu hymagwedd at wydnwch, gan gynnwys trwy gydgynhyrchu Partneriaeth Argyfyngau Cymunedau Llundain (LCEP), sef ymagwedd a arweinir gan y gymdeithas sifil at gydlynu parodrwydd ac ymateb i argyfyngau. Mae LCEP yn eistedd ar Fforwm Gwydnwch Llundain, ochr yn ochr â’r gwasanaethau brys ac asiantaethau cyhoeddus eraill, gan ddod â gwerth y llais a’r ddirnadaeth gymunedol i ymateb brys Llundain. Mae hyn wedi helpu i adeiladu ymddiriedaeth rhwng asiantaethau a chydweithrediad â’r gymdeithas sifil mewn ymateb i ddigwyddiadau.
Y gwersi allweddol
Gall gweithio ar y cyd â’r gymdeithas sifil cyn, yn ystod ac ar ôl argyfyngau gryfhau gwydnwch ac, yn achos y pandemig, wella canlyniadau iechyd, megis y niferoedd a gymerodd y brechlynnau. Gall modelau dan arweiniad y gymuned gynyddu ymddiriedaeth mewn gwasanaethau cyhoeddus, a sicrhau bod negeseuon ac ymagwedd y llywodraeth yn ddiwylliannol gymwys. Ar ben hynny, trwy gydnabod gwerth sefydliadau’r gymdeithas sifil o ran cyrraedd cymunedau lleol, mae’r GLA wedi llwyddo i weithio’n effeithiol gyda’r sector i fynd i’r afael â heriau cyffredin.
